奇女子出招，果然不同凡嚮。

*********

狄娜姐真係一個我好細個就睇佢睇到大既藝人。

我第一次睇佢，係一部電影。果陣我都唔知點解入到場，但係當然唔係我主動或自願架啦! 而且奇怪既係，唔係任何一位可能既男士帶我入場睇，係我婆婆帶我地三姐弟妹入場睇! 係咪好玄呢？我都覺得咁寫又幾係．．． 哈哈．．．　賣個關子唔講點解先!

當時果套電影，係一套黑白電影，有娜姐既上身裸露鏡頭。好坦白E+電視都唔一定睇到呢個鏡頭，因為會 cut，過唔到關。當時我重未懂性，唔知道咩叫裸露，所以當娜姐果一個全院震憾既一個 shot，最後重要行到鏡頭前 (真係差D貼埋個鏡頭既大 close up) fade out 既時候，我係有D唔係好明點解成間戲院都咁嘈，同埋我當時既感覺係'好大'、'好有壓迫感'，因為未見過咁既 close up 鏡，再者，我地重係坐'後座既前座'，其實貼切D形容，係覺得有兩座山就快'凜'落黎，有種好驚既感覺。

無幾耐，娜姐就主持'蒙太奇'。我真係好有幸我曾經睇過呢個節目。呢個節目當時令人最津津樂道，唔係娜姐既口才同才女既形像，都唔係點解佢咁好野，由脫星一躍而完全變身為才女而且咁成功咁有說服力，而係佢既'呼吸'。

呼吸? 係呀，當年佢係唯一一位主持係講野既時候有咁大咁深又咁明顯既呼吸，呢個已經係娜姐既標誌。前排睇到娜姐話重出江湖，我第一時間就諗，好呀! 我真好懷念蒙太奇，亦唔知點解特別想睇娜姐，或者係想搵返兒時既感覺卦?

娜姐係節目度笑自己話，早知當初唔駛拍脫片(呢個係當時既字眼，當時既報字報導好厚道，打頭陣一定會寫成邊個邊個女星為藝術而犧牲，女藝人會 classified 為脫星，呢類片統稱為脫片)。呢種自嘲既寬宏氣量，我真係要更加認真地好好去學習。再講，以娜姐既做人處世態度同哲學，各方面都令唔少人折服。講真我從來無因為記得佢拍過脫片而對佢有任何負面既感覺，反而係更敬重佢。其實我覺得拍過脫片呢樣事件在我黎講並唔會同個人道德同品德掛勾，講多無謂，無需解釋，支持我既講法既，就係娜姐本人呢個活生生既例子啦。

蒙太奇之後，我唔知娜姐去左邊，果陣細個無呢種好奇心。係佢淡出之後我只係記得有次佢比人入屋打劫，重比個賊劫持，佢著住一套睡衣比個賊箍住條頸既照片我重依稀記得。至於咩軍火咩國家國防，我都一慨無追問，只係覺得，嘩，好傳奇! 果然係奇女子既所為!

娜姐敢作敢言，我欣賞。頭先佢係節目度提及皇后碼頭同埋 '集體回憶' 既評語，我深有同感。又清醒又能夠簡單咁一語中的，將事實同背後既意義坦蕩蕩咁放係大家面前既人，又有幾多人做得到? 有咁既背景都未必有咁既才能，有咁既才能都未必有咁既膽色! 凈係果兩分鍾已經有足夠動力令我爬上黎寫 blog。

我飲殖民地水大，我著過有皇冠鈕既制服同帽仔，真係好靚! 英國既野好多都好有氣派好有睇頭。但係人活著，唔係為左一份氣派，國家既榮恥其實同我地更加有貼身關係。

再講落去，可能我又忍唔住講到政治問題，我自問女人講政治形象上的確係唔夠強，除非我學到娜姐一半以上啦．．．　所以．．．　我都係收筆啦，XD!